Rivedal – er ei lita, kreativ bygd på nordsida av Dalsfjorden i Sunnfjord, på solsida mellom Dale og Holmedal. Her finn du både gamle og nye Vikingar. Rivedal har sterke band til Island då dette er “Heimhøgum Ingolfs Arnarsonar”. Ingolf Arnarson og Leiv Rodmarsson, to blodsbrødre, reiste herfrå i år 871 +/-2 med folk og buskap til sagaøya Island. Leiv, også kalla “Hjørleiv” (frå Kleppeneset) vart drepen av trælar året etter at dei kom til Island. Ingolf er rekna som den første Landnåmsmannen på Island.
-1124 år seinare i 1995 kom dei to første Islandshestane tilbake til Rivedal. No i 2010 er der så mange Islandshestar i Dalsfjorden at Ingolfur Islandshestlag er skipa.
Rivedal er ei landbruksbygd i vekst. Her finn du beste fiskeelva i Askvoll kommune, her finn du og den einaste lysløypa i Asvoll.
Rivedal Kraftverk stod ferdig i 2005 og leverer straum til halve kommunen når vi har nok vatn. Bygginga av kraftverket realiserte parkering og lett tilkomst til fjellområda mot Stongfjord og Vagstaddalen mot Atlevatnet, Langevatnet og Nipebu, eller om du vil kan du nyte utsikta mot havet frå Heileberget “Fjøla.” Om du ikkje vil høgt til fjells, men vil ha ein tur i lågare terreng, kan vi anbefale ein tur til Eikenesstølen frå Vindheim, eller til Nedgard og Rivedalsstølane. Hyllset bru frå 1903 (rest:2003) ved gamle RV 609 til Grendahuset er verdt å ta ein kikk på om du er i Rivedal. Like ved Grendahuset finn du og Rivedal Galleri.
Sjå og statua av Ingolf Arnarson på “Bjønnshaugen” som er ei nasjonal gåve frå staten Island til Noreg. Statua vart lyssett i 2007, og årlege utgifter med flomlysa er det Rivedalsbygda som dekkar.
“VIN SINUM SKAL MADR VINR VERA” står det skrive på sokkelen til denne statua.
Det står ein bautastein i Rivedal og ein i Kleppeneset reiste av blodsbrødrene før dei drog til Island, og desse er verdt å sjå nærare på.
Det er lange båtbyggings tradisjonar i Dalsfjorden frå langskip til jekter og “Bakkejekta” vart bygd i rivedalsfjæra øst om Ripeneset av Sjur Vindheim i 1750-åra.Frå Ripeneset kan du sjå sør om fjorden til Jensbua ved innseglinga til Flekkefjorden, der kopien av jekta ligg idag.
Rivedal har med si historie opp gjennom århundra fått nokre spøkelseshistorier å dra på som ikkje skal nemnast her, men vil du vite meir om desse må du ta turen til Rivedal.

Rivedalsona er meint som ein “møteplass” for bygdefolket, utflyttere, nabobygdene våre og alle dei som er interesserte i heimtraktene, for på denne måten å kunne følgje med på kva som skjer i og rundt Rivedal og Dalsfjorden. Her finn du og bilder/ bildealbum med både nye og gamle bilder frå bygda og området rundt fjorden.
Denne sona er drifta på privat initiativ, har såleis ikkje støtte frå eller tilhøyrigheit til noko lag eller org.
(-bruk av, eller kopiering av tekst eller bilder frå denne sona – henvisning til åndsverkslova / opphavsrett.)
spørsmål om origo:

No ventar vi på Dalsfjordbrua! – og vegen vidare!

Bygda har og:
Rivedal Bygdelag (registerført i Norges Velforbund, Velnett)
Rivedal Grendahus ( til utleige, nyrestaurert i 2009, eigar: Rivedal Bygdelag)
Rivedal Galleri http://www.rivedalgalleri.no
(Rivedal Galleri har og eiga origo sone.)
Rivedal Kraftverk a/s
Rivedal Vannverk (vannverknr: 142806)
Riva Samdrift (Synnøve og Åsmund)
Rivedal Samdrift (Jan Ruben og Sigmund)
Rivedal er bygda med allt det rare. På Rivedalskletten finn du blant anna Bjørnehiet om du leitar….eller kanskje finn du restane etter ulvehytta på Longevassheia !! Mer om sonen